1. 中東戰雲密布，伊朗封鎖最短闊度得32km嘅霍爾木茲海峽，意圖癱瘓海運令油價急升，全球供應鏈所有嘢離唔開運輸，所以油價升可以話大獲過加租，由戰事起始，布油勁彈10-15%，經濟學上短期總供應因成本上漲而跌，推高通脹但同時減少產出，全球滯脹風險待爆 2. 返嚟香港，車用汽油已偷步加價，加幅約1-2%，布油已彈升，何以說偷步？香港油站一般有2-3周庫存，literally戰事影響未及油商，寡頭壟斷生態MC未動、價格先行🥹您懂的（可能是車主搶先排油谷高需求了吧） 3. 今日想講嘅係港油市場另一有趣現象，油站會賣所謂普通油同靚油，其實兩種油都係甲烷值98，只係後者會有添加劑，聲稱令引擎減少損耗，原來全世界只有香港將98 RON呢種油分兩級賣，一般車種出廠指引用95 RON已足夠，但港油站並無供應95 RON，即本身已焗車主買「靚油」，再分層榨消費者盈餘 4. 呢個算唔算3級價歧？你可以話靚油同普通油係兩種產品，但個分野可能只局限於情緒價值，將錫車嘅車主𠝹一波，引擎聲都好聽啲啦，如我之前喺航空公司艙等嘅分析講過，有壟斷能力嘅公司會愈加搵細微分野去創造更多價格分層，目標就係𠝹齊唔同彈性嘅人出嚟，利潤極大化
1. 傳統上戰爭時大家害怕手上銀紙貶值，資金會泊入貴金屬甚至乎有「數碼黃金」之稱嘅加密貨幣，用AI plot咗過去10年黃金及比特幣走向，喺呢10年前期嘅一啲區域性戰爭，例如：塔利班重掌阿富汗、俄羅斯入侵烏克蘭等，對避險資產價格所起作用極微 2. 要數算到哈瑪斯人質事件，以至以伊12日戰爭及今天美以伊混戰，這些避險資產才見反應，反映要去到具規模戰爭，人們或機構先走去避險，而且所謂避險其實也只是炒家嘅藉口，以黃金為例，228美國襲伊當日，黃金急升至紀錄高位5500美元，但隨後很快已回落返10%，可見避險是炒作多於實際用途 3. 有趣嘅係比特幣喺近半年中東拳來腳往期間都要見跌，輿論質疑比特幣今天已淪為與美國高風險科技股高度綁定嘅風險資產。經歷量子電腦可能破解加密算法、KK園首腦被凍結百億加密貨幣資產及美國愛潑斯坦案富豪揭密等事態，公眾對比特幣嘅感知有著結構性嘅變化。 4. 沒有永恆嘅「避險」，說穿了大眾認錢只認今天認受性、儲值能力及未來認受性，今天公眾對避險貨幣「無感」，原因可能已factor in 對戰事不會延續嘅預期，市場反而擔心戰事拉升通脹，美國減息步伐遲緩，資金成本持續高企，故先行沽售高風險資產。再退後一萬步諗，強者是美國，戰時流動性最強定必是美金，用強勢貨幣換要搬要抬嘅金，或是要有電、有資安先交換到嘅比特幣，也甚難說得過去 5. 終究避險是榥子，其實圖表睇近10年黃金與比特幣很相像，黃金總是緊隨比特幣走向，近期兩者走異可能並非異動，而是黃金腰斬嘅時間未到來而已
