【DSE ECON】通脹 Inflation 同 CPI｜通脹率、非預期通脹

通脹（inflation）＝一般物價水平（general price level）持續上升；通縮（deflation）＝一般物價水平持續下降。香港用消費物價指數（Consumer Price Index，CPI）量度，綜合消費物價指數嘅按年變動率一般用嚟反映整體通脹。通脹率公式：（今期 CPI − 上期 CPI）÷ 上期 CPI × 100%。例如政府統計處數字：2026 年 8 月綜合消費物價指數按年上升 1.7%。非預期通脹（unanticipated inflation）會令債務人得益、債權人受損。

作者：Rafael Ng（GUTS EDUCATION 高士教育 BAFS／Econ 導師）｜最後更新：2026年10月7日

通脹題考得好細：用 CPI 計通脹率、分預期同非預期通脹、判斷邊個得益邊個受損，再比較 CPI 同 GDP 平減物價指數。呢篇逐樣拆。

通脹 Inflation 係咩？同通縮 Deflation 有咩分別？

1. 通脹：一般物價水平持續上升，同一筆錢買到嘅嘢少咗，即係貨幣購買力（purchasing power）下降
2. 通縮：一般物價水平持續下降，貨幣購買力上升
3. 「一般物價水平」（price level）講緊整體物價，唔係單一貨品；一兩樣貨品加價唔等於通脹
4. 通脹率係正數，但數值細咗，物價仍然係上升緊，只係升得慢咗

消費物價指數 CPI 係咩？香港點編製？

1. 消費物價指數量度住戶購買一籃子消費品同服務嘅價格變動，基期指數定為 100
2. 政府統計處編製四個消費物價指數：甲類、乙類、丙類同綜合消費物價指數，分別反映唔同開支範圍住戶受物價轉變嘅影響
3. 每類貨品喺指數入面嘅權數（weight），反映住戶喺嗰類貨品上嘅開支佔幾多；住戶用得多嘅項目，權數就大
4. 課程唔要求你識編製 CPI，但要識用 CPI 計通脹率，同埋比較 CPI 同 GDP 平減物價指數嘅涵蓋範圍同權數
   

資料來源：政府統計處，消費物價指數表 510-60001 附註（2019 年 10 月至 2020 年 9 月＝100），2026 年 9 月 30 日擷取。

權數點樣影響 CPI？計算例子（數字只作示範）：假設一籃子只有三類貨品：

交通價格升得最多（10%），但因為權數只係 30%，整體 CPI 只係由 100 升到 105，即係通脹率 5%。

通脹率點計？（Inflation Rate Formula）

通脹率公式 Inflation rate formula：

通脹率 ＝（今期 CPI − 上期 CPI）÷ 上期 CPI × 100%

用 GDP 平減物價指數計都係同一條公式：（今期平減物價指數 − 上期平減物價指數）÷ 上期平減物價指數 × 100%

負數即係通縮

通脹成因：AD-AS 同貨幣數量論點解釋？

1. 總需求上升（AD 右移）：例如消費、投資或政府開支增加，一般物價水平上升，常叫需求拉動（demand-pull）
2. 短期總供應下降（SRAS 左移）：例如工資或原料成本上升，一般物價水平上升、產出下降，常叫成本推動（cost-push）
3. 貨幣數量論（quantity theory of money）：MV ≡ PY；假設 V 不變，如果貨幣供應增長快過實質產出增長，物價水平就會上升
4. 通脹缺口（inflationary gap）：均衡產出大過全民就業產出，勞工市場出現超額需求，物價有上升壓力

貨幣數量論公式 Quantity theory of money：

MV ≡ PY

假設 V 不變：物價水平變動率 ≈ 貨幣供應變動率 − 實質產出變動率

例子（數字只作示範）：貨幣供應升 6%，實質產出升 2% → 通脹率約 4%

預期 vs 非預期通脹：邊個得益、邊個受損？（Anticipated vs Unanticipated Inflation）

1. 名義利率 ＝ 實質利率 ＋ 預期通脹率（nominal interest rate ＝ real interest rate ＋ expected inflation rate）
2. 借貸雙方按預期通脹定名義利率，所以預期到嘅通脹，唔會令財富喺債務人同債權人之間轉移
3. 非預期通脹：實際通脹高過預期，實際（realised）實質利率低過預期實質利率，債務人還錢時嘅購買力少咗，所以債務人得益、債權人受損；非預期通縮就相反
4. 持有貨幣資產（monetary assets，例如現金、存款）嘅人，財富嘅購買力會因通脹下降；持有實物資產（real assets，例如物業）嘅人，資產價格一般會隨物價上升，受影響較細

計算例子（數字只作示範）：小明向銀行借 $100,000，一年期，名義利率 5%，借貸時雙方預期通脹 2%。

想一次過搞掂通脹、利率公式同貨幣數量論？睇返 → 宏觀經濟問題與政策 點播精讀（$388）

CPI vs GDP 平減物價指數（CPI vs GDP Deflator）

GDP 平減物價指數 ＝ 名義 GDP ÷ 實質 GDP × 100。兩個指數計出嚟嘅通脹率可以唔同，因為涵蓋範圍同權數唔同。想學埋名義同實質 GDP？睇返 → GDP 同 GNP 點播精讀（$388）

DSE 常見錯誤 Common Mistakes

1. 見到 CPI 高過 100 就當今年有通脹 → 要比較題目問嘅兩個時期
2. 通脹率跌咗就以為物價下跌 → 只要通脹率仍然係正數，物價仍然上升緊，只係升得慢咗
3. 答「通脹一定令債權人受損」 → 只有非預期通脹（實際高過預期）先會令債權人受損；預期到嘅通脹已反映喺名義利率
4. 將名義利率同實質利率撈亂 → 實質利率 ＝ 名義利率 − 通脹率；比較預期同實際實質利率
5. 以為 CPI 同 GDP 平減物價指數一定計出同一個通脹率 → 兩者涵蓋範圍同權數唔同
6. 將一兩樣貨品加價當通脹 → 通脹講緊一般物價水平持續上升

常見問題 FAQ

通脹係咩意思？

通脹（inflation）係指一般物價水平持續上升，同一筆錢買到嘅嘢少咗，即係貨幣購買力下降。一般物價水平持續下降就叫通縮（deflation）。香港一般用綜合消費物價指數嘅按年變動率反映整體通脹。

CPI 中文係咩？香港點編製？

CPI（Consumer Price Index）中文叫消費物價指數，量度住戶購買一籃子消費品同服務嘅價格變動。政府統計處編製甲類、乙類、丙類同綜合消費物價指數，分別根據較低、中等、較高開支範圍住戶同整體住戶嘅開支模式編製。

通脹率點計？

通脹率 ＝（今期 CPI − 上期 CPI）÷ 上期 CPI × 100%，用 GDP 平減物價指數計都係同一條公式，負數就係通縮。例如政府統計處數字：2026 年 8 月綜合消費物價指數為 110.8，2025 年 8 月為 109.0，按年上升 1.7%。

非預期通脹對邊個有利？

非預期通脹即係實際通脹高過預期，令實際實質利率低過預期實質利率，所以債務人得益、債權人受損。預期到嘅通脹已經反映喺名義利率，唔會令財富喺債務人同債權人之間轉移。

CPI 同 GDP 平減物價指數有咩分別？

CPI 涵蓋住戶購買嘅消費品同服務，包括進口消費品，用固定一籃子權數；GDP 平減物價指數涵蓋本地生產嘅所有最終產品同服務，唔包括進口，權數跟當期生產組合變，所以兩者計出嘅通脹率可以唔同。

延伸閱讀

・GDP 平減物價指數：留意比較年份，唔好高過 100 就當通脹

・貨幣數量論 QTM 10 誡

・影響 AD-AS 嘅因素：歷屆出過嘅因素逐個拆

想更具系統溫通脹、利率同貨幣數量論？

・英文版 2 小時 15 分鐘／中文版 2 小時 13 分鐘

・覆蓋經濟週期 4 大階段、4 大利率公式、通脹／通縮下不同群組嘅盈虧、貨幣數量論 QTM、香港稅制、財政政策與貨幣政策

・FPS／AlipayHK／PayMe 付款後 WhatsApp（wa.me/85262324240）提供電郵，以該電郵登記嘅 YouTube 帳戶會獲開通瀏覽權限，課堂筆記經同一電郵發送

通脹、通縮影響貨幣購買力，所以先有利率呢個概念；呢課由經濟週期、利率公式講到通脹下邊個得益、邊個受損。

睇 宏觀經濟問題與政策 點播精讀　$388

其他章節 → 全部點播精讀課程